សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានស្នើដល់រដ្ឋមន្រ្តីទាំងអស់ ដែលមិនបានទទួលតំណែងក្នុងរាជរដ្ឋាភិបាលថ្មីមេត្តាយោគយល់ ហើយត្រូវតែមានការលះបង់ ខណៈដែលអ្នកលះបង់ធំជាងគេគឺខ្លួនសម្តេច។ ការស្នើរបស់សម្ដេចតេជោនាយករដ្ឋមន្រ្ដីបែបនេះ បានធ្វើឡើងតាមរយៈសេចក្តីថ្លែងការណ៍ពិសេសផ្ញើជូនជនរួមជាតិនៅរសៀលថ្ងៃទី ២៦ ខែកក្កដា ឆ្នាំ ២០២៣។
សម្តេចតេជោ ហ៊ុន សែន បានថ្លែងថា សម្រាប់រដ្ឋមន្រ្តីនានាដែលមិនទទួលដំណែងជារដ្ឋមន្ត្រីតទៅទៀត អាចអង្គុយនៅក្នុងសភា ឬជាតំណាងរាស្រ្តព្រោះពួកយើងចាស់ៗណាស់ហើយ និងមួយចំនួនទៀតក៏ អាចទៅធ្វើជាទីប្រឹក្សារាជរដ្ឋាភិបាល មួយចំនួនទៀតក៏អាចក្លាយជាសមាជិកព្រឹទ្ធសភា នៅពេលខាងមុខផងដែរ ដែលនឹងពិនិត្យមើលនៅពេលក្រោយ។ សម្ដេចតេជោបានថ្លែងបញ្ជាក់ថា៖ «សូមស្នើដល់បងប្អូនរដ្ឋមន្ត្រីទាំងឡាយដែលមិនបន្តតំណែងក្នុងរដ្ឋមន្ត្រីបន្តទៅទៀតសូមមេត្តាយោគយល់យើងត្រូវតែមានការលះបង់ ហើយអ្នកដែលលះបង់ធំជាងគេគឺខ្លួនខ្ញុំ។ បើទោះបីជាកូនរបស់ខ្ញុំបន្តវេនក៏ដោយ ប៉ុន្តែអ្នកដែលធ្លាប់មានអំណាចបញ្ជា ពេលអត់មានអំណាចបញ្ជានោះគឺជាការលះបង់ហើយ»។
សម្តេចតេជោនាយករដ្ឋមន្រ្ដីបានលើកឡើងថា រដ្ឋមន្រ្តីមួយចំនួនមិនចូលកាន់ការជារដ្ឋមន្ត្រីតទៅទៀតទេ គឺយើងអាចឈរឈ្មោះជាសមាជិកព្រឹទ្ធសភាព្រោះសមាជិកព្រឹទ្ធសភាមួយចំនួនមានអាយុ៨០ ឬកៀកនឹង ៨០ ឆ្នាំ ដែលជាការល្មម នឹងចាកចេញ។ សម្ដេចតេជោបានអះអាងថា បើទោះបីព្រឹទ្ធសភាត្រូវមានអាយុច្រើនក៏ប៉ុន្តែអាយុច្រើនហួស ក៏មិនអាចធ្វើការកើតដែរយើងត្រូវគិតអំពីសុខភាព និងអ្នកបន្តវេនជំនាន់ក្រោយ៕
